Jaien aurreko jaialdia ospatuko da udal plazan ostiralean

Datorren ostiralean, ekainaren 19an eta jaietarako egun gutxi geratzen direla, jai aurreko jaialdia eginen da berriro Musika Eskolak antolatua. 13. edizioa izanen da bi urtez antolatu gabe igaro ondoren eta Barañaingo kultur eta kirol erakundeak parte hartuko dute: Musika Eskolako musikari eta kantariez gainera, Barañaingo Abesbatza, Ezpelur Gaitariak, Harizti Dantza Taldea, Barañaingo txistulariak, Erraldoi eta Buruhandien Konpartsa eta Lagunakeko gimnasia erritmikoko taldea. Baita Team Rockers break dantza taldea gonbidatu dute.

Jaialdia gaueko hamarretan hasiko da eta ordu eta hogei minutuko iraupena izanen du. Hiru zatitan banatuko da eta egitaraua honakoa izango da:

Lehenengo atalean agurra eginen dute akordeoilariak, txistulariak, eskolania eta Harizti Dantza taldeak. Ondoren “Igitai” dantzatuko dute Hariztiko dantzariak txistularien laguntzarekin. Barañaingo Abesbatzak “Contigo en la distancia” eta “Lata d´agua” abestuko dute kapelaz eta atala bukatzeko akordeoilariak, txistulariak, abesbatza, musika banda eta Hariztik “Aitor” lana interpretatuko dute.

Bigarren atala hasteko show bat eginen dute Team Rockers break dantza taldeak. Lagunakeko gimnasia erritmikoa taldeak “Navras” abestia antzeztuko du eta berriro Team Rockers-ek erakustaldia eginen du. Ondoren “Edurne” bals-a interpretatuko dute gaitariek, bandak eta Erraldoiak. Atal hau bukatzeko “Lantz” lana interpretatuko dute akordeoilariak, txistulariak, abesbatzak, eskolaniak, bandak eta Hariztik.

Hirugarren atala hasiko da musika bandak eta gimnasia erritmiko taldeak eginen duten Abbaren abesti baten antzezlanarekin. Ondoren “Axuri Beltza” dantzatu eta abestuko dute akordioilariak, bandak, abesbatzak, eskolaniak eta Hariztik. Axuri beltzaren ondoren sanferminetako pot-pourria eginen dute txistulariek, gaitariek, abezbatzak, eskolaniak, bandak eta Hariztik. Bukatzeko, guztiek batera agurtuko dute eta Nafarroako Gorteen ereserkia interpretatuko da.