Bigarren eskuko azokan parte hartzeko epea irekita dago

Azaroaren 10ean 11:00etatik 15:00tara burutuko da Barañainen Udalak eta Iruñerriko Mankomunitateak antolatutako truke eta bigarren eskuko azoka. Ekintza bostgarren kontenedorearen aurkezpen kanpainaren barruan kokatzen da eta Mankomunitatearen informazio puntuaren ingurunean eginen da -Merkatal etorbidean, 4. zenbakian-. Azokaz beste, Euskal Kantak eta Todo Musica elkarteek kaleak alaituko dituzte 12:00etatik aurrera, eta birziklatze tailerrak, txikientzako kukusu merkatua, kaleko antzerkia eta altzarien erakusketa eta salmenta izanen dira. Izena emateko epea azaroaren 4a arte izanen da zabalik.

Azokaren helburua da, alde batetik, topagunea izatea eta bestetik, «kontsumoko gure ohiturei eta haien ondorioei buruzko gogoeta, bai eta gauzen bizitza baliagarria amaitzen duten ardurazko jokaerei eta birziklatzeari buruzko gogoeta» egitea dela adierazi dute antolatzaileek.

Leku mugatuak

Azokan parte hartu dezakete elkarte, eskola, kolektibo nahiz norbanakoek, helduak edo adingabekoak eta haurrak izatekotan beste pertsona baten laguntza izan beharko dute. Partaidetza doakoa da baina aurretik izena eman behar da eta horretarako mankomunitatearen webgunean inskripzio fitxa bat bete daiteke, www.manconecta.com helbidean. Epea azaroaren 4a arte izanen da irekia eta 6an partaideei adieraziko diete onartuak izan diren edo ez. Lekuak mugatuak daudela adierazi dute Mankomunitateak eta Udalak eta antolakuntzak ipiniko ditu mahiak, mahai bat partaide bakoitzeko.

Etxeko objektu txikiak, dekorazio objektuak, haurrentzako artikuluak, kirol artikuluak, oinetakoak, apaingarriak, jostailuak, arropa edota liburuak saldu edo elkartrukatu daitezke. Era berean, azokan parte hartu nahi dutenentzat baina postua jarri nahi ez duenarentzat salmenta puntu bat jarriko da non antolakuntzak salduko dituen objektu horiek. Horretarako azoka ireki baino ordubete lehenago artikuluak Informazio Gunean aurkeztu beharko dira eta inbentario bat eginen da. Azoka bukatzerakoan lortutako dirua eta saldu ez diren objektuak itzuliko zaizkio jabeari.

Ikastaroak

Honekin  batera eta kanpaina honen barruan, helduentzako tailerrak ere antolatu ditu Mankomunitateak: ostegun honetan, urriaren 31an "Baratza zure terrazan" tailerra eginen da 17:30etatik 19:00tara Merkatal etorbideko Informazio Gunean; azaroaren 8an zizareen bitarteko konpostai ikastaroa burutuko da; 14an Alex Mugikaren eskutik janari soberakinak baliatuz sukaldaritza tailerra eginen da eta 15ean eta 22an etxean konpostaia egiteko tailerrak eginen dira. Horietan parte hartzeko ere izena eman behar da informazio gunean edo internet bitartez.

Halaber, haurrentzako ekintzak antolatu dira, tailerrak asteazkenetan eta puzgarriak larunbatetan: azaroaren 6an, barazki eta frutekin paisaiak eginen dira eta 13an brik ontziak erabiliko dira diru-zorroak egiteko. Bi ikastaroetan txokolatada egonen da eta helduen tailerretan gertatzen den bezala, izena eman behar da aldez aurretik. Tailerrak 6 eta 12 urte bitarteko haurrei zuzenduta daude eta 17:30etatik 19:00tara burutuko dira. Puzgarriak, aldiz, azaroaren 9an, 16an eta  23an izanen dira, larunbatetan, Merkatal etorbidean.