Barañaingo Egunaren perla

Asteetako lana, hamarnaka boluntarioren laguntza eta barañaindarren parte hartzea berriz 
ere herriko kaleetan. Hemen da Barañaingo Eguna. Hasi dira jada lehen jardunak, ostegun 
eta ostirala bitartean, eta larunbatean izango da egun potoloena. Baina egun hau festa bat 
baino gehiago da. 
Barañaingo Jai Batzordeak, beste eragile batzuekin batera, egitarau oparoa prestatzen du 
urtero, data berberetan. Ez dago urte osoan zehar egun hoetako martxa mantentzerik, baina 
ordu batzuetan gutxienez, herriko kulturari eta kultur-sortzaileei leiho bat irekitzea lortzen 
dute. 
Barañainen hamaika eragile dira arlo ezberdinetan lan egiten dutenak. Doan ematen dute 
pertsona askok bere denbora, indarra eta imajinazioa. Norabidea: herri bizi baten aldeko 
hautua. 
Dantzak, bertsoak, musika, mitologia, hizkuntza… Denak dira Barañaingo izaera eratzen 
duten elementuak. Baina Barañaingo Egunak bestelako emaitzak ere ematen ditu. Ekimenez 
aparte, antolaketa prozesu oso bat dago atzean, pertsona ezberdinek batera zerbaiten 
prestaketan erabili dituzten orduak alegia. Prozesu honetan bizilagunen arteko harremanak 
sortzen dira, dinamika hauek emango ez balira sortuko ez liratekeenak. 
Barañain sortzen duen hori ez da zementua, ez dira eraikinak, ez dira karreterak; 
bizilagunen arteko harremanak dira herri mailako gizarte txiki honetan aldaketak sortzeko 
gaitasuna dutenak. Barañain bizia lortu nahi dute askok. Bizitasun horren bidean aurrera 
eramaten diren prozesuetan, partehartzaileen arteko balore berriak hazten dira, herria 
“egiteko” modu aurrerakoiak, eta inguruarekin erlazionatzeko ikuspuntu ezberdinak. Izan 
ere, indibidualismoan murgildutako mundu hegemoniko horretatik atera eta bestelako 
pentsamoldea lortzen da. Bada sorkuntza edota gure bizitzaren antolaketa ulertzeko beste 
modu bat. Hau da Barañaingo eguneko altxorra.